Mat 14 | BJR | STEP | Mi-aukuanná Eeroodeefa Karidaia máqannaa úriqararafa firaafá márinau. Roomma máqannaa kiapana ameemaanai uréeqánoo márida rakísinoo márinau. Faiqí ánaasee misá Yísuna amooqímammaree ánufanoo Eeroodeefa írinoo narí áiku ásauku maaqí qímasee qímanniminau.

Matthew 14

Eeroodeefa Yoohaneena ákiaqa túqinau.

(Mareekoo 6:14-29; Ruka 9:7-9)

1 Mi-aukuanná Eeroodeefa Karidaia máqannaa úriqararafa firaafá márinau. Roomma máqannaa kiapana ameemaanai uréeqánoo márida rakísinoo márinau. Faiqí ánaasee misá Yísuna amooqímammaree ánufanoo Eeroodeefa írinoo narí áiku ásauku maaqí qímasee qímanniminau. 2 Maafá Yísufa Yoohaneefa nammári nímimarufa kúqiranakiqari fíndifinoo Yísunaikinoo máridanoo, maa-afeeka firaa ainainná áuqaidaqinoo fee qinau.

3 Eeroodeefa narí ákaqa ánaaqa áuqu Eeroodia námmarina mároofa mi-anaaseefá qufanoo iriséenoo Yoohaneena rumbéeqeenoo karafúsaki quqásoofanoo márinau. Yoohaneefa Eeroodeena narí ákaqa ánaaqa Eeroodia námmarina mároonara áqinoo qinau. Anée sándufa rukíeenana mi-anaaseená máraananoo. Miqí qufanoo mi-ufánara áranaqoofanoo Eeroodia námmarina ufara karafúsaki rumbá quqánau. 5 Eeroodeefa Yoohaneenara kuqáruani qínaqa faiqí ánaasee minára írifoora. Misá aiqáma Yoohaneenara Ánutuna tamummáqara fasiqa fee qufanoo Eeroodeefa minára óonumafi iriséenoo minára rufíeenoo sía árinau minnísee káqi rumbánau.

6 Eeroodeena máqoo aukuanafa kindáaramambufanoo miqóo faiqí ánaasee suqú maree oomáqammánee máriqau. Eeroodia námmarina áraamuna fannoo sukúraki máridanoo áaduma idi ráma akoofása quqámaqoofa máridanoo qoomáqammánee máruna qámbaanai faiqí ánaasee nífusaa fíndifi idí ranau. Eeroodeefa mi-manaaqáfa idí roona qáfoofanoo káaqa ámiqi ámiqinau. 7 Afaaqa ámiqi ámiqufanoo narí amana aqiqéenoo mi-manaaqána qímaminoo qinau. Anée nánaree áidinana qímaqiminaqa qinée minákaimmámianaura idí ráannana ákiaqara ámianaura.

8 Mi-manaaqáfa Eeroodeena ufa iriséenoo sandéenoo narí ánoona Eeroodia námmarina óonu qímamisoofanoo írinau. Yoohaneefa Eeroodeena faqa mi-anaaseená faqa níqunara mi-manaaqána ánoofa áranaqee márufanoo máriufa mári máridanoo narí áraamuna fannoo óonuree narí ánoona qímamufanoo miná ánoofa mi-karí Yoohaneena árira irirana paqúrinau. Óo dóo maqee mifá qiní díqufa kúquannoo. Miqí qímaseenoo Eeroodia námmarifa narí áraamuna qímaminau. Anée óonuree qínanoo Eeroodeefa Yoohaneena ákiaqa ituqú pirítasaqa saka ámiani qufanoo mi-manaaqáfa mi-ufána iriséenoo ani randéenoo Eeroodeefinnai óonureenoo narí ánoona ufa kai qímaminau.

9 Eeroodeefa mi-ufána irisoofanóo aundurá mandáikinau. Faiqí ánaasee nífusaa qeeqá qimana aqiqámasaunnanara óonumafi íriqa qisaurúanoo qímaseenoo eedóo kai qinau. Eedóo qímasee narí firisuaiqáuqa niqiqanáu, óonuree Yoohaneena ákiaqa túqumaree miná ámiaqee qufaqa firisuaiqáuqa misá iriséeqa karafúsa máaqaki kéeqafiqa Yoohaneena ákiaqa túqiqau. 11 (Mi-maqannáasa miná fidíka maqásaa áqufuandoo qímaseeqa pirítaki sákaqau sía nárarau miqíqau. Káqi fífau fidíka áqufuandoo qímasee miqíqau.) Yoohaneena ákiaqa misá túqu pirítasaqa sakamáree mi-manaaqána miná ámiqau. Amisoofanoo mifá máree múnu narí ánoona áminau. 12 Yoohaneena faiqinámu mifá kúqunara íriqa ani karafúsa maqakinaana ani miná irí mara máreeqa múnu madikaqau. Madikámaseeqa misá Yísufunnai óonureeqa mi-ufána qímamiqau.

Yísufa féemu faqa noodáanna faqa moómoosa níminau.

(Mareekoo 6:30-44; Ruka 9:10-17; Yoohanee 6:1-14)

13 Yísufa mi-ufána Yoohanee árunara iriséenoo ummaararoofanoo nammáriki óoquree kanúqaki narí faiqi námufaqa akarámafufanoo naríara faiqí sía márutinai finau. Faiqí ánaasee Yísuna sípa fannoo nammáriki fímarufaqa qáfamásee faiqí ánaasee maqúsa máqusa tatúfufaqa maqámau áfaindanai miqóombiqau. 14 Yísufa kanúqakiqari maqásaa áqufinoo níndafoofaqa moómoosa ani márufanoo. Óonureenoo misára ámuqusufanoo misáki aurímarusa aurírana taikánnisanau.

15 Eendí márufaqa miná faiqinámu miná ufa írimarusa aniréeqa Yísuna qímamiqau. Maa-maqa maaqánaki faiqí síai maqa maaqaki, súani dóo kéeqaidanoo. Anée faiqí ánaasee niqiqáinaqa maqúsa máqusa nárana feefaurúmmasee námasee faiqaaqa. 16 Yísufa iriséenoo maaqí qímasee narí faiqi námu qímanniminau. Ínnee fífau niqiqeefáara. Ínneeqá kai nárana nímiaqa.

17 Miqí qímasoofaqa misá qiqau. Maasáki féemu rumbárafa moodáannai qísauku kai máridanoo. Noodáanna qaaraqánda kai máridanoo. 18 Yísufa iriséenoo qinau. Dóo miná kai qiní qímiaqa.

19 Miqí qímaseenoo faiqí ánaasee aiqáma qímanniminau. Aiqáma andanda rasoonóokammásee óoqumariaqa.

Miqí qímaseenoo mifá féemu moodáannai qísaukunamu faqa noodáanna qaaraqánda faqa qumáreenoo innaarúnnai óori uqéeraseenoo Ánutunara dúfi dúfi qímaseenoo féemu ruqí ruqímáseenoo narí ufa írimarusa nísaukuki quqásoofaqa misá qumáreeqa faiqí ánaasee nímiqau. 20 Faiqí ánaasee aiqáma námasoofaqa nímuaqufaqa Yísuna ufa írimarusa uqá qumáreeqa misá óoqu marúqoo fíqu fíqu ídaqa nárana andaanauqá uqáriqau. Qísaukuqara taikásee qíkunni qaaraqánda uqa qumbiqásee máraqau. 21 Mi-naranná noosá faiqí kai óoni sáqari máqusa mandá samu múquiqa máriqau. Fáifa tauséenna máriqau. Ánaasee faqa faiqi faqa ootúpa máfufaqa máaqa máaqa qumbíqa maqíqau.

Yísufa nammári ámuaqumau áiku rámasee finau.

(Mareekoo 6:45-52; Yoohanee 6:15-21)

22 Námasoofanoo Yísufa narí ufa írimarusa niqiqéenoo qinau. Ínnee sípaki qiní dóorinni nammári dínni afainni fímarifaqa qinée faiqí ánaasee niqiqámasee kásoo fuanáura. 23 Mifá faiqí ánaasee niqiqámaseenoo naríara áaqanai innaaru qíraree qímasee akarámafinoo innaaru qinau. Mi-eendánaki áaqanai naríaraa márinau. 24 Yísufa áaqanai márufaqa miná faiqi námu sípaki farúma qámbaanai óonuroofanoo úfai firaafá nóorindari úqinoo nammári ámakaurínoo miná ufa írimarusa sípaki kadáapirida fímariqau.

25 Iqáqarafa qúsaramáfufanoo Yísufa nammári ámuaqumau áiku rámammaree misá unnái finau. 26 Nammári ámuaqumau fímarufaqa miná faiqi námu qáfamásee áfaanna fee qímaseeqa káaqa rufíamaree fáaqariqau. Yísufa iriséenoo qímanniminau. Sía rufíaaqa. Ínneeqa nímuqusa ubíqaaqa. Qinée máridaqa. 28 Peetooroofa Yísuna ufa iriséenoo qinau. Karaambáiqa kúqaa anée máridana qínaqa anée íanánnai nammári ámuaqumau qinée faqa fuanáura. 29 Yísufa iriséenoo qinau. Dóo ánia. Peetooroofa iriséenoo sípakiqari ráudamakufanoo nammári ámuaqumau Yísufunnai finau. 30 Fímarufanoo úfai firaafá úqufanoo rufíamareenoo dóo nammáriki ukúqnanau. Nammáriki ukúqnaidanoo fáaqarumaseenoo Yísuna áaraidanoo qinau. Karaambáiqa qiní qumáraa. 31 Yísufa iriséenoo dauní miná ásauku qumáreenoo qinau. Anée nánaree qaara aundura írinanee. Anée sía qinísaa írirana rusí máriananoo.

32 Miqí qímaseenoo miqandá sípaki akaraqau. Ákaramafufanoo úfai taikánau. 33 Sípaki káqi márusa misá miná qáfamáseeqa náaquqoofaqa Yísuna óorinni aniréeqa nóorindari mapámufufaqa Yísuna amooqíqa qiqau. Kúqaa anée Ánutuna ámaaku máriananoo qiqau.

Keeneesareeta máqannaasa aurírausa andeeqánnisanau.

(Mareekoo 6:53-56)

34 Misá sípaki nammári dínni afainni táqakufaqa Keeneesareetee máqusai óonu raqau. 35 Mi-maqusánaa fásiqauqa óonuree miná óori qáfamáseeqa maafá aurúasa andeeqée márifa qímaseeqa ufa quqásoofanoo máaqa máaqa maqúsa maqúsa ufa finau. Aurímarusa aiqáma súqeeqeeqa Yísufunnai quqáqau. 36 Aurímarusa misá aniréeqa maasá moómoosa márida Yísufa sía maasá aiqáma andeeqáqisáandoora qamunna átikai amanée maasá káqi áuqaananoo aurírafa taikáannoo fee qufanoo Yísufa eedóo qímasoofaqa miná qamunna áti áuqamásoosa aurírafa aiqáma taikéenoo ámiqi uqannammannísanau.